Asal Kata Tutuan

Kene ane madan ‘tutuan.” Kruna tutuan mawit uli kruna “tuhu-tuhu”, adan kedis mamata barak, mabulu selem. Mamunyi satungil peteng. Kocap ane malu, rikala Ni Berit Kuning ulung ka semere ngelidin Kesatryawangsa di Gumi Keling [Jawi sisi Kauh], atman dane malecat marupa kedis tuhu tuhu. Ento tuah sipta. Tuhu artine pasaja, jati-jati seken. Nah apa sujatinne ane madan tuhu, tusing ada len tuah atma. Ane pasaja ada di idupe tuah Sang Hyang Atma. Widhi ane ada di sisi madan Parama atma. Widhi ane ada di tengah ukudanne madan atma. Iraga nak tutuan baanga sipta, apang sujati miara atma.

Kenken ca

rane miara atma? Atmane ento kone perlu dadaaran ane madan sangu pati, bekel buin mani rikala atmane mulih ka parama atma. Bekele ento madan budi hening, laksana ayu. Anake wikan ngorahang tutur kapatian. Di lontar Wrehaspatitatwa ada tutur kene: yan matutur ikang atma ri jatinia, artine: yening sang hyang atma eling, ditu ida [sang maraga jatma] uning kasujatian. Ento ane madan tutuan.

Nah yen atmane perlu dadaran ane madan sangu pati, basa jani madan nutrisi jiwa, deweke ene perlu dedaaran ane madan sangu urip. Apa ento sangu urip, tusing ada len, ane ngranaan iraga seger, luire nasi, jukut-jukutan, bebean, miwah ane lenan.

Para lingsire ngorahang, nirguna dadi tutuan yening tuara nawang kasujatian. Nirguna purane ngreneb yening pura di deweke romon, ngorta pati kacuh, tuyuh nguber kasugihan, atmane di tengah tuara taen madaar. Basang nyantung tuara nawang kangin kauh, gelem sai-sai.

Yening ada odalan di pura ane ada di bukite di Gunaksa, krama Tutuan di

Gunaksa biasa ngorahang mabakti “ngeduluang”. Ngeduluang, kruna linggane “dulu” maan anuswara “ng” pangiring “ang”. Artine yen basa Indonesia; menuju hulu, menuju puncak. Yening rahina mangkin tegak odalan di Pura Bukit Buluh artine iraga sedekan ngalih ening,.tongos eninge mula di ulu. Yening ulune puek, sinah ane di teben masi puek. Dumadak ida sueca, ngicen ening iraga ajak makejang.